Вевчанскиот карневал, традиционално на сатиричен и хумористичен начин и годинава ги отслика случувањата на политички, здравствен, економски и спортски план од минатата година, се делеа и „ковид сертификати“, се протестираше и за тениската ѕвезда Новак Ѓоковиќ, а се копаа и биткоини.
На карневалот продефилираа и маски на пратеникот Кастриот Реџепи, директорот на Центарот за управување со кризи, Стојанче Ангелов, претседателот на Регулаторната комисија за енергетика, Марко Бислимовски, поранешните премиери Никола Груевски, Зоран Заев…
„Ова е театар на отворено и секогаш треба да се гледаат работите кои укажуваат дека нешто не треба така да се прави. Ако видите многу грубост, пораката е не бидете груби, ако видите вулгарност, пораката е не бидете вулгарни“, порача градоначалникот на Вевчани, Спасе Кочовски.
Вечерва во склоп на карневалот настап ќе имаат македонските уметници Елена Јовчевска, Сања Ристеска, Дамјан Стојаноски и Перо Бели, а Новата година ќе се дочека со спектакуларен огномет.
Манифестацијата завршува утре, со традиционалното василичарско оро и палење на маските во центарот на Вевчани.
Фото: Фејсбук/Мицкоски