Градоначалникот на Општина Ресен, Живко Гошаревски денеска ја прими првата доза вакцина против Ковид-19, од кинескиот произовдител Синофарм во регионалниот вакцинален пункт во спортскиот центар „Бијанини извори“ во Охрид.
По вакцинацијата, изјави дека се чуствува одлично и оти ќе ги следи препораките на здравствените работници, со апел до граѓаните да се вакцинираат, бидејќи, како што рече, само на тој начин можат да се заштитат себе и своите најблиски.
– Се вакцинирав, пред се, да ги заштитам моите најблиски. Како доктор и како градоначалник сакам да упатам апел до граѓаните масовно да се пријават и да се вакцинираат, бидејќи тоа е единствениот начин да се победи оваа подла болест, нагласи Гошаревски.
Ресенскиот градоначалник упати благодарност до организираторот и медицинските тимови, а организацијата на вакциналниот процес ја оцени на највисоко ниво.
-Голема пофалба за организаторот, медицинските тимови, администрацијата на локалната самоуправа од Охрид, полицијата и војската, кои активно се вклучени во процесот.
Од она што можев да забележам има огромен интерес меѓу населението и се надевам во периодот што следува ќе биде уште по масовно, рече Гошаревски.
Градоначалникот нагласи дека терминот за вакцинација го добил по претходна најава на vakcinacija.com.mk.
МИА/Фото: Фејсбук/Гошаревски