Сајтовите на министерствата за здравство и за образование се уште не се во функција, откако македонските „Анонимуси“, односно групата која стои зад профилот на Твитер, ANONOPSMKD ги хакираше завчера.
Министерството за здравство вчера информираше дека не функционираат ниту службените мејлови на вработените во институцијата, но според твитот на „Анонимуси“, тие не го загрозиле „маил серверот“, тој бил изгасен од страна на како што ги нарекоа „шалабајзерите што се систем админи во тие министерства.“
Здраво на сите, едно мало известување за вчерашниот напад.
МкдОпс ВО НИТУЕДЕН МОМЕНТ не го загрози маил серверот на здравство, само направивме екстракт на мејловите.
Сајтовите, и маил серверот СЕ ИЗГАСЕНИ од страна на шалабајзерите што се систем админи во тие министерства.— AnonOpsMKD (@MkdOps) July 24, 2020
За разлика од сајтот на Тајм.мк, кој по нападите речиси веднаш профункционира и дополнително му беше поставена заштита, веб-страниците на институциите се уште не функционираат.
Македонските „Анонимуси“ најавија и напад на страниците на извршителите. Во интервју за IT.mk тие најавија повеќе напади, но се оградија од нападот врз страницата на Државната изборна комисија (ДИК), која не функционираше на денот на изборите.
„Многу таргетирани напади, Тајм беше само мал почеток, наредните напади се од огромен калибар, мора некој да изреагира на ваков начин во оваа држава, очигледно со добро ништо не се постигна во последните 20 години.
Секако нема да бидат 2-3 напади, се спремаме за преку 30-40 напади во рок од неколку недели. И да, ниту еден напад нема да биде ДДОС“, велат тие во интервјуто.
Деновиве тие ги хакираа и сајтовите на пејачките со албанско потекло Рита Ора и Дуа Липа.
ПОВРЗАНИ ВЕСТИ
Македонските „Анонимуси“ се „заканија“ на Твитер: Извршители вие сте на ред
Министерство за здравство за еМагазин: Страната ни е хакирана, не ни функционираат ни мејловите
Игор Трајковски за нападот на „Тајм.мк“: Поврзано е со некој од сајтовите кои ги индексираме