Намалената потрошувачка поради кризата со корона вирусот го измести нафтениот пазар во светот и предизвика историски најниска вредност на нафтата.
Американската лесна нафта вчера го продолжи својот пад и цената изнесуваше „минус“ 37,63 долари за барел. Неколку часа пред затворањето, цената беше еден цент за барел за испорака во мај.
За споредба, во 2011 година, таа нафта чинеше речиси 114 долари за барел.
Цената на суровата нафтата за испораки во мај вчера на берзата во Лондон падна пониско од еден долар, достигна еден цент и отидe во минус, откако снабдувачите започнаа да плаќат за испораки во мај, за да можат да ги ослободат терминалите.
Рокот на испораките за мај истекува денеска и според познавачите обесценувањето на мајските испораки е поради тоа што нема купувачи кои се подготвени да ги примат испораките кои започнуваат од 21 април.
Сепак, испораките за јуни не поевтинија толку. Западно-тексашката лесна нафта за јуни се продава за 22.67 долари за барел, додека „Брент“ чини 26.60 долари за барел.
Падот на цените на суровата нафта е поради растежот на количините на складирана суровина – капацитетот на терминалите е искористен максимално затоа што нема купувачи.
Земјите од ОПЕК+ на 12 април договорија намалување на вадење на нафтата за 9.7 милиони барели дневно во мај и јуни.
Договорените страни очекуваат намалувањето да се зголеми до 19 милиони барели дневно откако од 1 мај ќе се приклучат и САД, Канада и Норвешка.
ПОВРЗАНИ ВЕСТИ
Бензините поскапуваат за половина денар, цената на дизелот останува иста
Бензините на историско најниско ниво: „Еуросупер БС-95“ падна под 50 денари