Вечерва разговаравме со српскиот претседател Александар Вучиќ во Атина. Ме увери дека како преставник на српската држава, тој ги смета македонскиот народ и македонската држава за исклучително пријателски и дека доколку некој македонски граѓанин е навреден од било која порака од српската држава, тој лично ќе се извини, напиша синоќа премиерот Димитар Ковачевски на неговиот Фејсбук-профил.
Oва следува откако српскиот министер за одбрана Милош Вучевиќ, изјави дека Македонија и Црна Гора се огрешиле кон Србија со признавањето на независноста на Косово и дека тоа ќе им се удри од глава.
Српскиот министер оцени дека „постои голема меѓународна поддршка за создавање на Голема Албанија, нагласувајќи дека тоа не е прашање само за Србија, туку и за нејзините соседи.“
„Дали нашите пријатели во Северна Македонија спијат мирно? Дали спиете мирно? Тие мислат дека се во НАТО пактот и ги решиле своите проблеми со него. Тоа е мантрата и на Црна Гора и на Северна Македонија. Кога станаа членки на таа колективна безбедност, односно НАТО Алијансата мислат дека си ги решиле сите проблеми и дека ништо не може да им се случи,“ изјави Вучевиќ.
По изјавата на српскиот министер, реагираше и министерот за надворешни работи Бујар Османи, кој на неговиот Фејсбук-профил напиша дека „очекува појаснување од министерот за одбрана на Србија“.
По средбата со Ковачевски, Вучиќ на неговиот Инстаграм-профил напиша дека Србија и Македонија се вистински пријателски земји.
„Ако мене ме прашувате, братски. Нема и не смее да има недоразбирања меѓу нас. Ништо не бараме од нашите браќа, единствено што нудиме е искрено пријателство,“ напиша Вучиќ.
Фото: Влада