По неуспехот од последнниот дијалог во Брисел меѓу Белград и Приштина, и по вооружениот напад во Бањска во северно Косово, големата петорка предводена од специјалниот претставник на ЕУ за дијалог меѓу Белград и Приштина Мирослав Лајчак, денеска, после Приштина допатуваа во Белград на средба со српскиот претседател Александар Вучиќ во обид за продолжување на дијалогот за да се намалат растечките тензи меѓу Србија и Косово, јави дописникот на МИА од Белград.
Во делегацијата предводена од Лајчак се и заменикот помошник државен секретар и специјален пратеник на САД за Западен Балкан, Габриел Ескобар, советниците за надворешна и безбедносна политика на претседателот на Франција и канцеларот на Германија, Емануел Бон и Јенс Плетнер и дипломатскиот советник на премиерот на Италија Франческо Тала.
И додека Вучиќ на Инстаграм профилот кусо напиша дека „средбата со петорката била тешка и дека верува дека во наредниот период ќе се најде излез од кризата, како и дека очекува важни средби во Брисел наредните денови, Лајчак по средбата даде повеќе информации пред новинарите, потенцирајќи дека „нема европска иднина за Србија и Косово без имплементација на договорот за патот кон нормализација и сите досегашни договори“.
“Сакаме да гледаме стабилен, просперитетен и европски регион на Западен Балкан и затоа дијалогот е од клучно значење. Нашиот разговор со претседателот Вучиќ и косовскиот премиер Албин Курти ќе продолжи и во наредните денови, ” заклучи Лајчак.
Лајчак и неговиот американски колега Ескобар, придружувани од највисоките дипломати на Германија, Франција и Италија, во Приштина се сретнаа и со премиерот на Косово, Албин Курти, кој по разговорите изјави дека е потребен „нов пристап“ за продолжување на дијалогот за нормализација на односите со Белград.
ПОВРЗАНИ ВЕСТИ
Тежок разговор со петорката на ЕУ, САД, Италија, Германија и Италија, оцени Вучиќ
МИА/Фото: Еулекс