Не стивнуваат реакциите за затворањето на Еуростандард банка и полемиките околу прашањето дали банката можела да се спаси.
Од Народната банка јасно посочија дека сопствениците не го обезбедија потребниот капитал за првата половина од оваа година, ниту изнеле издржано и реално решение за пренесување на сопственоста на инвеститор којшто би извршил докапитализација на банката во обем и со динамика кои би овозможиле нејзина одржливост, со оглед на состојбата во која банката се наоѓаше.
„Во интензивната комуникацијата со сопствениците, Народната банка постојано јасно укажуваше на сериозноста на состојбата во којашто се наоѓаше Банката и инсистираше на итна докапитализација, потенцирајќи дека ако не се случи докапитализација, Народната банка ќе нема друг избор освен преземање на најстрогата мерка – укинување на дозволата за основање и работење на Банката“, соопшти Народната банка.
Од друга страна, акционерите на Еуростандард банка пред само една година водеа преговори со Комерцијална банка, но не најдоа заеднички јазик за цената по која Комерцијална би ја презела Еуростандард, туку зедоа кредит од 10 милиони евра, што само покажува дека имало реална шанса да се спаси банката, но проблем била заработувачката.
Акционерите неодамна соопштија дека за банката имало заинтересиран инвеститор од Дубаи, меѓутоа од Народната банка не сакале да одвојат време за потенцијалниот купувач. Според НБМ, станувало збор за несериозна понуда.
Во целото фијаско, се чини дека најголеми жртви се вработените. Имено, доверителите на банката и штедачите ќе бидат обештетени. Но, без егзистенција ќе останат 161 вработен, колку што имало во банката заклучно со јули, годинава.
ПОВРЗАНИ ВЕСТИ
Богов: Гувернерката ја донесе единствената исправна одлука за „Еуростандард банка“