Одредени субјекти поради кои трпи целата угосителска дејност, тераат инает и кон себе и кон граѓаните и кон пазарните инспектори. Кон таквите немаме милост и мораме да постапуваме согласно законот, рече денеска директорот на Државниот пазарен инспекторат, Стојко Пауновски.
Пауновски на прес-конференција во Владата соопшти дека за жал, и по една година од пандемијата, се уште има угостители, но и граѓани кои не ги почитуваат протоколите. Инспекторите се секојдневно на терен, а ако има потреба дејствуваат и со асистенција на полицијата.
-Она што се случува од одредени субјекти поради кои трпи целата угосителска дејност, сметаме дека е терање инает и кон себе и кон граѓаните и кон пазарните инспектори.
Од Нова година до денес имаме преку 78 затворени објекти поради непочитување на протоколите, за работење преку работното време и за нерегистрирани даночни обврзници.
За жал, и по една година се соочуваме со субјекти, претежно угостителски објекти, но и граѓани, кои дозволуваат да се направат пропусти кои ние ги санкцицонираме. Повеќе пати сум кажал дека во поголем број случаи успеваме да затекнеме на лице место и тогаш веднаш постапуваме, истакна Пауновски.
Во врска со свадбата во Струмица, директорот информира дека инспекторите веднаш тргнале, но кога стигнале веќе немало нешто. Информација ја добиле откако свадбата завршила.
ПОВРЗАНИ ВЕСТИ
Прекината свадба со 300 гости во струмичко, кривична за три лица
-Инспекторите влегуваат во сите региони, населени места и секаде онаму каде што добиваат дојави благодарение на граѓани. Притоа, постапуваат согласно надлежностите и законот. Таму каде што инспекторите ќе проценат дека не можат сами да постапуваат, секогаш одат со асистенција на полицијата, рече Пауновски.
Одговорајќи на новинарско прашање, Пауновски повтори дека по 20 часот, кога почнува полицискиот час, дозволено е да се врши достава на храна и пијалаци, но сите што вршат достава на храна мора да имаат соодветна дозвола за движење и во Државниот иснпекторат за труд да бидат пријавени за ноќна работа.
Во однос на цените на лековите, посебно на оние за превенција и заштита од Ковид-19, Државниот пазарен инспекторат, рече Пауновски, нема ингеренции.
ПОВРЗАНИ ВЕСТИ
– Немаме никаква надлежност да ги следиме тие покачувања на цените, освен ако истакнатата цена на лекот не е ставена и во фискалната каса. И во земјава и во цела Европа владее пазарна економија. Она што има државна цена како нафтата, таму може да делуваме ако има поскапување или поевтинување.
Лани кога беше вонредна состојба имаше производи кои не смееја да поскапат. За жал, сите производи што поскапуваат влијаат на пазарната економија, но сме прифатиле да бидеме пазарна економија, објасни Пауновски.
ПОВРЗАНИ ВЕСТИ
Пораст на цените сред пандемија: Поскапеле маслото, шеќерот, овошјето, зеленчукот, месото…
На прес-конференцијата претходно, претседателката на Инспекцискиот совет, Магдалена Грашкоска соопшти дека продолжуваат зајакнатите контроли.
Од 29 март до 4 април биле спроведени вкупно 5.236 надзори од кои преку 4.500 реализирал Пазарниот инспекторат и изрекол 34 прекршочни пријави, како и 43 платни налози, а донел и 91 решние за констатирани неправилности.
Грашкоска потсети дека денеска стапи во сила целосната забрана за работа на угостителските објекти и воедно ги охрабри инспекторите да немаат толеранција ако утврдат какви било недоследности или непочитување на мерките.
МИА/Фото: Влада