Пекабеско АД за периодот јануари-март 2022 оствари позитивен финансиски резултат искажан во неревидираниот Биланс на успех во износ од 15,2 милиони денари и е понизок за 35% од 2021 година, информираат од компанијата преку Македонската берза.
“Главните причини за послабиот резултат се: состојбата на замрзнати продажни цени со одлука на Влада за период од 01.12.2021 до 28.02.2022 година, порастот на трошоците за енергија за 200% во однос на минатата година, како и раст на сите влезни цени за набавка на суровини и репроматеријали и појавата на Африканска чума и неможност да извезуваме на некои наши пазари во јануари и февруари“, велат од компанијата.
Остварените вкупни приходи од работењето во периодот јануари-март 2022 година изнесуваат 1.157 милиони денари и во споредба со остварените во истиот период во 2021 година бележат зголемување од 16%.
“Во структурата на вкупните приходи најголемо учество од 98,5%, имаат приходите остварени со продажба на готови производи, стоки и услуги кои во споредба со остварените во 2021 година бележат зголемување од 15%.
Остварените вкупни расходи во периодот јануари-март 2022 година изнесуваат 1.140 милиони денари и во споредба со остварените во истиот период во 2021 година бележат зголемување од 17%.
Вкупните инвестиции во основни средства во периодот јануари-март 2022 година изнесуваат 3,5 милиони денари, а во истиот период минатата година изнесувале 1,4 милиони денари. Инвестициите се главно во производствена и транспортна опрема.
Бројот на вработени во Пекабеско за периодот јануари-март 2022 изнесуваше 473 вработени, повеќе за 18 од минатата година“, велат од компанијата.
ПОВРЗАНИ ВЕСТИ
Пекабеско лани со намалена добивка
Пекабеско со раст на добивката за 4%
Фото: Пекабеско