Јавното обвинителство од Струмица покрена истрага за две лица за кои има основано сомневање дека присилиле малолетничка која имала наполнето 14 години на снимање слики и видео клипови со порнографска содржина, кои потоа ги праќале на трети лица преку социјална мрежа.
На двете лица им е одреден притвор во траење од 30 дена.
„Основното јавно обвинителство Струмица донесе Наредба за спроведување истражна постапка против две лица за кои постои основано сомнение дека сториле кривични дела – Прикажување порнографски материјал на дете и дистрибуција на детска порнографија.
Во август 2019 година, осомничените на возраст од 24 и 27 години, присилиле малолетничка која имала наполнето 14 години на снимање слики и видео клипови со порнографска содржина.
Тие ја повикале оштетената во напуштен локал во еден трговски центар, каде без нејзина согласност извршиле полови дејствија врз неа и тоа го снимиле.
Видеото потоа го направиле достапно, така што преку социјална мрежа го испратиле на трети лица“, соопшти денеска Обвинителството.
Надлежниот јавен обвинител до судијата на претходна постапка од Основниот суд во Струмица доставил предлог за определување мерка притвор за двајцата осомничени, поради опасност од бегство, можност да влијаат врз оштетената/сведокот и можност да го повторат делото.
Судијата го прифатил предлогот и на осомничните им определил притвор во траење од 30 дена.