Рочиштето за случајот „Плацови на Водно“, денеска не се одржа поради отсуство на обвинетиот Сашо Мијалков.
Одбраната на обвинетиот како што извести судијата Илија Трпков, го информирала судот дека истиот е позитивен на коронавирусот. Позитивни на Ковид-19 според судот се и неколку адвокати на обвинетите.
На денешното рочиште беше предвидено да биде сослушан сведокот Кирил Божиновски. Следното рочиште за овој предмет е закажено за 24 јануари.
Случајот го води судијата Илија Трпков, а застапник на обвинението е обвинителката Лиле Стефанова.
Според обвинението, поранешниот премиер Никола Груевски е обвинет за делата „перење пари и за противправно стекнување и прикривање на имот”, неговиот кум Ристо Новачевски, бизнисмените Ненад Јосифовиќ, Јордан (Орце) Камчев и Ратка Куновска Камчева се товарат за „перење пари”, а првиот братучед на Груевски и поранешен директор на Управата за безбедност и контраразузнавање (УБК), Мијалков, е обвинет за „помагање при кривично дело перење пари и други приноси од казниво дело”.
МИА