Украинскиот систем за пренос на гас ГТСОУ соопшти дека „поради виша сила“ од денеска ќе го прекине преносот на руски гас преку влезната точка Сохранивка.
Сохранивка е една од двете клучни точки за снабдување со руски гас во Европа. И покрај руската инвазија која почна на 24 февруари, Украина останува важна транзитна рута за пренос на руски гас во Европа.
ГТСОУ објави дека не може да продолжи со работа на компресорската станица Новопсков поради „мешање на окупаторските сили во техничките процеси“.
Компресорската станица Новопсков во областа Луганск, источна Украина е под контрола на Русија, веднаш по почетокот на инвазијата. Тоа е првата компресорска станица во Луганск, транзитна рута за околу 32,6 милиони кубни метри гас дневно, една третина од рускиот гас што се транспортира во Европа преку Украина.
МИА/Фото: Влада