Поранешниот министер за надворешни работи Никола Димитров по вчерашната посетата на еврокомесарот Оливер Вархеји, кој не даде изјава за медиумите по средбите со македонскиот државен врв во Скопје порача дека е важно претставниците на институциите од Брисел кога доаѓаат на Балканот да имаат контакти со јавноста, а не само со политичарите.
Димитров во гостување на ТВ Сител рече и дека Вархеји давал паралелни предлози на предлозите на германското и на португалското претседателство и тоа, како што истакна, пробугарски.
-Еврокомесарот по дефиниција ни е најдобар пријател и во таа смисла каков било исчекор треба да е заеднички успех, меѓутоа, за жал од конкретниот еврокомесар Вархеји немав баш такво искуство, бидејќи солираше и поставуваше паралелни предлози на предлозите на германското и на португалското претседателство и тоа пробугарски. И на тој начин го компромитораше напорот на двете претседателства, рече Димитров.
Воедно порача дека по последните изјави од бугарскиот политички врв е крајно време да видиме каде одиме и како таму да стигнеме.
– Ние имаме еден екстрем по секоја цена во ЕУ, или другиот екстрем е да ги баталиме ЕУ и да си бараме други партнери, наведе поранешниот шеф на дипломатијата.
Истакна дека мора да се бориме за вистинска европска игра.
-Не може некој нас да ни го дообјаснува македонскиот јазик. Не може во преговарачката рамка историјата да биде поважна од борбата против корупцијата. Мораме да направиме политика која што ќе покаже дека ветото е штетно и за Бугарија, оти вака ветото им работи.
Ние сме тие што ни се брза, ние сакаме да правиме чекори, а сигналот е ќе дојдат на нашето. Затоа мораме да почнеме да употребуваме зборови кои што ја отсликуваат реалноста.
Во моментов политиката на Бугарија кон нас не е пријателска, оти со вакви пријатели не ни требаат непријатели. Кога ќе кажат македонскиот идентитет е фалсификат мора да викнеме ова безобразно, ова е дрско, засрамете се!, рече Димитров.
Тој потенцираше и дека, како што рече, „за оваа приказна мора да се информираат партнерите на Македонија во ЕУ во регионот, Американците и сите други кои се заинтересирани ова да успее“.
ПОВРЗАНИ ВЕСТИ
Мицкоски се сретна со Вархеји: Преговори со ЕУ веднаш и без дополнителни условувања
МИА/Фото: МНР