Илјадници граѓани се собраа на протестот во Минск, Белорусија против изборните резултати според кои 80 отсто од гласовите ги добил Александар Лукашенко, контроверзниот лидер кој веќе 26 години е на чело на државата.
Станува збор за протести какви што досега биле несфатливи за оваа земја.
Неговата противкандидатка на изборите Светлана Тихановскаја која пребегна поради страв од реперкусии порача дека е подготвена да стане лидер на Белорусија и повика да се повторат изборите.
„Јас сум подготвена да преземам одговорност и да дејствувам во овој период како национален лидер, за да може државата да се смири и да влезе во нормален ритам, за да ги ослободиме сите политички затвореници, и во најбрз можен рок да подготвиме законодавна рамка и услови за организација на нови претседателски избори“, вели Светлана Тихановскаја.
Од друга страна Лукашенко обвинува дека протестите се организирани од странски фактори и дека повторни избори не доаѓаат предвид.
Лукашенко ја има поддршката на Русија, додека францускиот лидер Емануел Макрон побара од европските земји да ги поддржат мирните протести на опозицијата во Белорусија.
Фото/Видео: Youtube/Guardian