Започна изградбата на системот за топлификација на Битола, Могила и Новаци, кој ќе користи топлинска енергија од РЕК Битола, информираат од Електрани на Северна Македонија.
Градежните работи почнаа во кругот на РЕК Битола, односно во непосредна близина на блоковите за производство на електрична енергија.
„Планот е на топлификацијата на почетокот да се приклучат 35 државни и општински институции во Битола кои ќе искористат една третина од капацитетот на системот. Со другите две третини ќе се задоволат потребите на големите станбени и деловни згради и на индивидуалните куќи во Битола, Новаци и Могила.
Еколошките придобивки од Топлификацијата се исклучително значајни. Со воведување на ваков вид на греење во голема мера ќе се исфрли од употреба загревањето на горива кои загадуваат, како во институциите така и во домовите.
Трасата на топловодот ќе поминува низ Новаци и Могила, кои се две рурални општини кои во значајна мера се потпираат на земјоделството, и топловодот ќе даде можност за загревање на земјоделски оранжерии и објекти, со што ќе обезбеди дополнителна поддршка на развојот на земјоделството во регионот,“ изјави генералниот директор на АД ЕСМ, Васко Ковачевски.
Тој додаде дека со проектот се доцнело, бидејќи имало пропусти во планирањето.
„Така како што беше смислен и поставен – проектот беше економски неисплатлив и еколошки неприфатлив. Прво, претходно немаше стретегија што со топлификацијата кога РЕК Битола веќе нема да произведува струја од јаглен.
Сега имаме решение на тоа прашање-стратегијата е замена на дел од капацитетот на РЕК со когенеративна електрана на гас, која ќе произведува електрична и топлинска енергија. Имаше нерешени имотно правни односи по текот на трасата на топловодот.
Тоа прашање го решаваме сега, со експропријација. И многу важно. Овој проект од исклучително значење за Битола, Новаци и Могила треба да биде еколошки, а претходно беше предвидено да има потстаница за догревање на влезот во Битола која ќе работи на мазут, што е недозволиво.
И тоа го решивме – сега ќе има потстаница на природен гас,“ додаде Ковачевски.
Министерот за економија, Крешник Бектеши изјави дека реализацијата на овој проект за изградба на топлификациона мрежа во Битола, Новаци и Могила ќе има големо влијание врз зачувување на животната средина, а од друга страна ќе ги намали трошоците кај домаќинствата за загревање, односно ќе иам поконкурентни цени од другите енергенти кои се користат, што е наш најголем приоритет.
За проектот Топлификација на Битола, Могила и Новаци се користи кредит од германската KFW банка во вредност од над 40 милиони евра, а дополнително АД ЕСМ ќе инвестира 7 милиони евра сопствени средства.
Изведувачот има рок од две години за изведување на првата фаза од проектот за која е потпишан договорот, а тоа е ископ за трасирање на топловодот и поставување на топловодните цевки од РЕК Битола до градот Битола, како и секундарна, односно дистрибутивна мрежа во градот, по што следува втората фаза во која ќе бидат поставени потстаници кои ќе го поврзат цевководот со РЕК Битола и цевководот со разгранетата дистрибутивна мрежа низ градот Битола.
Во третата фаза ќе бидат поставени потстаници на институциите кои ќе бидат приклучени на греењето.
Фото: ЕСМ