Црвен Крст собра околу 874.000 евра за помош на семејствата на жртвите и за повредените во пожарот во т.н. дискотека во Кочани, соопшти денеска генералниот секретар на Црвен крст Македонија, Саит Саити.
Одлучено е секој настрадан да добие по 150 илјади денари првична помош, а за префрлување на средствата потребен е матичен број и писмена изјава со своерачен потпис, за тој кој ги дава податоците.
Поради тоа, и исплатата на средствата се уште не е започната.
„Изминатиов викенд Црвен крст успеа да ги собере податоците од семејствата на починатите. Во соработка со Службата за општи и заеднички работи (СОЗР) на Владата, при крај е собирањето на податоците за повредените кои се на лекување во странство. Останува уште да се соберат податоците за хоспитализираните во Македонија.
Прво ќе бидат исплатени пари на семејствата на починатите, а потоа методологијата е дека ќе се исплаќаат пари согласно степенот на понатамошно лекување. Знам дека има критики во јавноста, но мораме да го почитуваме законот. Видовме што се случи со непочитувањето на законите“, рече Саити.
Парите се собрани од граѓани од Македонија и од странство, компании, локални самоуправи, државни институци.
Донаторската кампања ќе трае уште десетина дена.
ПОВРЗАНИ ВЕСТИ
Отворена платформа за директна донација за семејствата на повредените во пожарот во Кочани
Фото: Фејсбук