Три нафтени компании се обиделе со лажни фактури да добијат поврат на ДДВ и исплати по основ на данок на личен доход во износ од близу 3 милиони евра, информираа денеска од Управата за јавни приходи (УЈП).
„Станува збор за три даночни обврзници и петмина добавувачи. Нема оштетување на буџетот затоа што даночните службеници спречиле исплати за поврат на ДДВ од 160.117.130 денари и за данок на личен доход од 18.969.998 денари,“ информираше директорката на УЈП, Сања Лукаревска.
Компаниите се обиделе да ги изиграат законите преку промена на назив и седиште на правното лице, како и промена на сопственичката и управувачката структура, без да имаат пријавени вработени, соодветни лиценци од Регулаторната комисија за енергетика, бензинска пумпа и складишен простор, служејќи се со фиктивни фактури за милионски суми.
За овие случаи УЈП доставиле писмени пријави со докази до Основното јавно обвинителство и МВР на 15. ноември 2023 година, а до Управата за финансиска полиција на 1. декември 2023 година.
Фото: Унсплеш