Детската ликовна колонија „Мал Битолски Монмартр“ и годинава го посети прекрасното светилиште Бигорски манастир.
Стотина млади уметници од 20 земји во светот (Албанија, Босна и Херцеговина, Бугарија, Индија, Израел, Јапонија, Кина, Македонија, Малезија, Полска, Португалија, Романија, Србија, Словачка, Турција, Франција, Хрватска, Чешка, Црна Гора), со своите штафелаи, четки и палети и пред сè, со својот уметнички талант и младешки творечки дух, ги пренесоа на сликарско платно архитектонските и природните убавини на Манастирот, секој преку својата лична естетска перцепција.
На учесниците им беа доделени пофалници, а како најдобри цртежи беа избрани четири дела на учесници од: Португалија, Кина, Чешка и Србија.
Во знак на благодарност за гостољубието и благословот, организаторите на настанот му се заблагодарија на Старецот Епископ г. Партениј, и му подарија три икони изработени од школата на Православната богословија „Венјамин Костачи“, Романија (Православна Црква на Романија). Тие, исто така, на Старецот му ги подарија и делата од минатогодишната колонија.
Извор/фото: bigorski.org.mk