Одлуката на американскиот претседател Доналд Трамп за воведување на царини има значајни импликации врз глобалната трговија и може да предизвика промени во меѓународните економски односи, велат од Finance Think.
„Нашата трговија со САД е ограничена, главно поради географската оддалеченост. Во 2024, извозот во САД како удел во вкупниот извоз изнесуваше 1,4%, што е многу мал удел. Од таа гледна точка, директните ефекти од зголемените царини ќе бидат многу мали.
Повеќе од половина од извозот кон САД во 2024 се однесувал на групата машини и транспортни уреди, во кои доминантен дел (две третини, или 38.3% од целиот извоз кон САД) преставува извоз на автобуси и слични моторни возила.
Скоро 90% од извозот кон САД во 2024 година е концентриран во 20-тина производи, при што освен автобусите кои имаат доминантно учество, уште неколку производи јасно може да се сврзат со работата на странските фабрики во ТИРЗ-овите.
Нивниот удел во вкупниот извоз кон САД изнесува најмалку 55%, односно околу 0.7% од вкупниот македонски извоз.
Оттука, иако вкупниот директен притисок од американските царини за македонскиот извоз е многу мал, поголем дел од него ќе падне врз работата на странските фабрики во земјава.
Царините ќе влијаат врз вкупните трошоци на фирмата-мајка, што ќе се одрази и кај нас, во негативни сценарија преку т.н. каскадни ефекти на намалено производство и работни места.
На пример, групацијата на најголемата странска фабрика во земјава, Џонсон Мети (околу 12% од вкупните приходи од продажба генерирани во Северна Македонија), има изложеност кон пазарот во Северна Америка од 28%, што претставува значаен удел.
За групациите на останатите фабрики во ТИРЗ-овите нема доволно-расчленети и лесно-достапни податоци, но, на пример, Дрекселмаер (треторангиран странски инвеститор во земјава), известува за 3 од вкупно 59 производни локации кои се наоѓаат во САД, додека Кромберг и Шуберт (второрангиран странски инвеститор) нема значајна изложеност кон САД,“ се вели во соопштението на Finance Think.
ПОВРЗАНИ ВЕСТИ
Царините на САД за Европа, ќе го намалат растот на економијата и ќе ја зголемат инфлацијата
САД воведоа 33% царини за увоз од Македонија
Одлуката на САД за царините, нема да има голем импакт врз нашата економија, велат од Влада
Фото: Unsplash