Европскиот суд за човекови права донесе пресуда со која Македонија ќе треба да плати отштета од 18.000 евра на дете кое било врзувано за неговиот кревет додека престојувало во Заводот за заштита и рехабилитација Б.Б.С..
Станува збор за дете кое родителите го оставиле како бебе, а старателот го сместил во институција.
„Врзувањето на Л.Р. за неговиот кревет ноќе и често во текот на денот додека престојувал во ЗЗРББС, го влошило и онака неговиот несоодветниот третман. Судот го наоѓа за особено загрижувачки фактот дека ваквата „мерка“, која сама по себе е некомпатибилна со човековото достоинство, се применувала врз осумгодишното дете околу една година и девет месеци.
Судот смета дека апликантот сигурно претрпел страдање како резултат на неговото несоодветно сместување во ЗЗРББС во периодот од јуни 2012 до април 2014 година, за кое време честопати му била врзувана ногата за креветот.
Ова страдање несомнено предизвикало во него чувства на беспомошност и вознемиреност. Одлучувајќи на правична основа и имајќи ја предвид тежината на повредата, заедно со времетраењето и нејзините ефекти со оглед на посебната ранливост на апликантот, Судот смета дека е соодветно да му досуди на апликантот 18.000 евра во однос на нематеријална штета, плус секој данок што може да се наплати.
Треба да се направат соодветни аранжмани, така што оваа сума ќе може да се користи од страна на овластен старател кој ќе постапува во најдобар интерес за апликантот“, пишува во пресудата.
Целата пресуда ТУКА.