Грција од денеска е во карантин кој ќе трае до 30 ноември. Граѓаните ќе може да излезат само доколку е неопходно со претходна најава на СМС порака.
Зголемена раздвиженост синоќа се забележа во продавниците и супермаркетите во повеќе делови на Атина, но и на автобуската и железничката станица, како и на автопатите за излез од грчката престолнина.
Грците, максимално го искористија последниот ден пред почетокот на денешниот карантин што ќе трае три седмици, за шопинг, но и прошетка.
Фризерските и козметичките салони и берберниците, кои со одлука на Владата ќе работат и за време на викендот, беа преполни. За нив карантинот ќе почне во понеделник.
Поради големата раздвиженост на граѓаните, имаше проблеми во сообраќајот во Атина, но и на автопатите за излез од градот.
Според информациите во грчките медиуми во петокот изутрина, за само три часа, од патарините за излез од Атина, поминале над 12.000 возила.
Зголемена била раздвиженоста и на атинското пристаниште, како и на меѓуградската автобуска станица и на железничката станица. Студентите си заминаа во нивните градови, жители на Атина, се упатија кон нивните села и викендички.
Поради зголемениот број патници и за да се избегне гужва, од грчката железница соопштија дека денеска и утре ќе има вонредни возови.
Ситуацијата, како во центарот на Атина, така и на излезните точки од градот, потсетуваше на претпразничен период.
МИА