Православните христијански верници во земјава утре го слават Бадник, ден пред големиот празник Рождество Христово – Божик. Поради епидемијата на коронаворусот во Охрид како и во останатите градови нема да се одржат традиционалните детски бадникови литии на кои децата го навестуваа големиот празник на Христовото раѓање.
Наместо поворките, од Здружението за православни вредности „Бадникови поворки“ повикуваат утре точно на пладне верниците да се помолат за подобра година за сите.
Православните верници со голема почит ги одбележуваат овие празници. Божик е Господски празник и се празнува во спомен на раѓањето на Господ Исус Христос.
Овој празник е матица на сите други црковни празници, бидејќи со Христовото раѓање се смета и почетокот на новата ера. Семејството на Бадник се собира на заедничка вечера и според обичајот таа вечер не се оди на гости, а се приготвува богата, посна трпеза.
МИА