Владата ги усвои измените на Законот за здравствена заштита со кои ќе се регулираат цените во приватните болници за хоспитализација на болните од Ковид-19.
Измените, како што вечерва соопшти владината прес-служба, ќе бидат испратени на усвојување во Собранието.
– Со предложените измени се уредува и начин на вршење на здравствена дејност од страна на приватните здравствени установи при утврдено постоење на кризна состојба заради заштита на јавното здравје и прогласена епидемија или пандемија на заразна болест, а на Владата и се овозможува законско овластување да определува највисоки цени во приватните болници во висина на референтните цени утврдени од страна на Фондот за здравствено осигурување на Република Северна Македонија за да се овозможи овие услуги да бидат подеднакво економски достапни за сите граѓани, со што ќе се заштити јавното здравје и економските интереси на сите граѓани, се вели во владиното соопштение.
Со предложените измени е предвидено и користење на ресурсите на приватните болници доколку условите го наложуваат тоа согласно состојбата предизвикана од пандемијата и се забранува преземањето на здравствените работници од јавното здравство од страна на приватните здравствени компании.
Предвидени се и измени во делот на глобите за прекршоци доколку приватните здравствени установи не постапуваат согласно законските одредби.
Со измената на Законот за здравствена заштита се предвидува цените во приватните болници да бидат изедначени со рефернтните цени утврдени од Фондот за здравство, односно дијагонстицирање и лекување на ковид пациенти да се движи од 40.000 до 305.000 денари.
ПОВРЗАНИ ВЕСТИ