Ви го пренесуваме постот кој на Фејсбук го сподели доктор Горан Кунгуловски, кој објаснува зошто треба да се вакцинираме против Ковид-19.
“Ајде да пристапиме логички и разумно и да утврдиме каква е реалноста.
Ковид пандемијата го начека целиот свет неспремен и до пред 9 месеци сите бевме во скоро безизлезна ситуација. Тоа е реалноста.
Вирусот беше високо заразен на почетокот, сега стана уште неколку пати позаразен. Тоа е реалноста.
Смртноста е под 0.1% кај млади и како се зголемува старосната граница така се зголемува и смртноста до 15-20%. Значи во најдобар случај, ако не вашиот, тогаш родителот или дедото/бабата на некој што го знаете ќе почине.
Кога ќе се земе заразноста и бројката на инфицирани предвид, тоа се преведува во многу голем број на смртни случаи и целосна блокада на здравствениот систем. Со тоа и умирање или влошување на хронично болните што не се заразени. Што и го гледаме. Тоа е реалноста.
За ова повеќе да не биде реалност и да не биде безизлезна ситуација, целиот научен свет како никогаш досега се сплоти и за рекордно време со многу пари и претходни знаења од SARS-CoV-1 и MERS и другите сезонски коронавируси направи ВИСОКО ЕФЕКТИВНИ (не се перфектни, бидејќи ниедна вакцина не е) вакцини. Тие вакцини драстично (10-30 пати) го намалуваат ризикот за смрт и хоспитализација.
Значи ризикот за смрт на стар човек го прават сличен како ризикот за смрт на млад човек. Многу родители, дедовци и баби, СПАСЕНИ. Исто така вакцините ја намалуваат шансата за инфекција и понатамошно расејување на болеста. Со тоа многу луѓе што во друг случај би се заразиле ќе останат незаразени и спасени. Тоа е реалноста.
Да се биде вакциниран и инфициран е една болест од истиот вирус. Да се биде невакциниран и инфициран е консеквентно друга болест предизвикана од истиот вирус.
Има два избори:
Да се вакцинирате сами и да ги убедите да се вакцинираат вашите родители, баби и дедовци. Со тоа им давате многу голема шанса за да ја преживеат оваа пандемија, макар и се заразиле. Тоа е реалноста.
Да не се вакцинирате, значи дека сигурно ќе се заразите: дали сега, дали за еден месец, дали за една година. Со тоа ќе укажете дека не ви е гајле ни за вас ни за вашите родители, дедовци, баби, пријатели и сограѓани.
Не дозволувајте да се случат семејни трагедии поради нечиј инает и незнаење. Досега се покажало дека болеста Ковид-19 води од неколку пати до стотици пати поголем ризик за остварување на вашите најголеми стравови отколку било која вакцина.
Засега, вакцините се единствениот излез за намалување на страдањето и црната смрт. Ситуацијата е таква. Лоша. Ако имате друг предлог, научниот свет е спремен да слуша.
И не, засега нема лек за вирусот“, напиша тој.
ПОВРЗАНИ ВЕСТИ
Доктор Кунгуловски објаснува за делта сојот и вакцините и прогнозира кога ќе имаме нов пик
Фото: Кунгуловски/Фејсбук