Штипската манифестацијата „Пастрмалијада“ годинава ќе се одржи во септември, a за локацијата дополнително ќе се одлучува.
Секретарот на Општина Штип, Вишна Шорова-Ангелова, вели во тек е подготовка на програмата, како и преговори со потенцијалните партнери од бизнис – секторот.
– По пауза од неколку години, Општина Штип оваа година планира да ја реализира манифестацијата „Пастрмалијада“ и тоа на 23 и 24 септември. Во текот на овој период веќе се прават планови за тоа кои да бидат изведувачите кои би настапиле за време на овој настан.
Веќе имаме некоја програма за која преговараме со потенцијалните изведувачи. Настанот ќе биде дводневен и ќе биде во соработка со бизнис – секторот и сите заинтересирани кои би сакале да имаат свои штандови. Сè уште размислуваме за местоположбата и ќе одлучиме која локација ќе биде најсоодветна за оваа година, вели Шорова – Ангелова.
Манифестацијата финансиски ќе биде поддржана од Општина Штип, но и од потенцијалните партнери на проектот со кои би се постигнал договор.
– Буџетот зависи од бројот на учесници, меѓутоа и Општина Штип во рамките на својот буџет има предвидено финансиски средства за реализација на „Пастрмалијада“, меѓутоа самиот настан ќе се организира во соработка со бизнис – секторот, додава Шорова – Ангелова.
Изминативе две години манифестацијата не се одржа поради ковид-пандемијата. Ова ќе биде 14. издание, откако во 2019 година се одржа 13. по ред издание.
ПОВРЗАНИ ВЕСТИ
МИА/Фото: Општина Штип