По денешното рочиште за предметот „Софтвери“, поранешниот генерален секретер на Владата, Драги Рашковски одржа брифинг со новинарите пред кои презентираше дека постои владин допис за прием со архивски број 45-3576/11, со потпис на тогашниот владин генерален секретар Мухамед Зеќири од кој може да се види дека софверот е предаден во Владата и истиот е инсталиран.
„Имате изјава на премиерот во која вели дека е запознаен со набавката. Уште повеќе што ќе може да ви го доставиме доказот 376. Премиерот писмено се има изјаснето кога Државното правобранителство побара да се изјасни.
Премиерот вели дека сѐ е набавено за потребите на Владата, сѐ е инсталирано, нема штета, се работи, нема никаква штета на буџетот,“ изјави Рашковски и посочи дека по завршување на доказната постапка од Обвинителството, тоа ќе се потврди.
Правниот тим на Рашковски изјави дека софтверот е набавен со Одлука на Влада, со документ за технички прием и во целосно легитимна постапка, а ова го потврдува и ОЈО со материјалните докази.
„Постои одлука на Владата за набавка на „спорниот” софтвер којашто датира од декември 2019 година. Постојат и документи што потврдуваат дека софтверот има технички прием. Тоа значи дека е почитувана целосно постапката за набавка во Влада и дека целиот процес е легитимен.
И покрај тоа што тој документ постои и докажува дека се е законски спроведено, ОЈО го игнорира овој факт и свесно продолжува да брани обвинение кое нема никаква основа.
Поради тоа следниот месец ќе направиме и јавно вештачење на централна скопска улица за да се увери јавноста дека софтверот функционира,“ велат од правниот тим на Рашковски.
Фото: Влада