„Донирај компјутер” од денеска функционира во нова работилница, за околу две седмици бројката на донирани компјутерски машини ќе достигне две илјади. Ова денеска го соопшти основачот на оваа иницијатива, Борче Стаменов.
– Отсега ќе работиме во овој простор од околу 25 квадратни метри. Имаме нови алатки набавени од наградата на Дојче Телеком. Нови 20 волонтери, вкупниот број на лица коишто волонтираат сега е околу 40, имаме многу подобри услови за работа.
Проширен капацитет на работилницата од шест на 12 работни позиции. Ова за нас значи дека ќе можеме да бидеме уште поефективни и побрзи во праќањето на компјутерите.
Во иднина истото ова ќе се направи и со работилницата во Скопје.
Има најави од повеќе големи фирми и државни институции за донирање на нивна опрема во „Донирај компјутер”, информираше Стаменов.
Работејќи во фирма што се занимава со продажба и изработка на софтвер за книговодствено работење, „Бидат информатика” од Кавадарци, тој своевремено дошол на идеја сите кои имаат стари компјутери што фаќаат прашина во некој ќош, да ги донираат, тој да ги среди и да ги подари.
За неговата хумана работа ја имал целосната поддршка од своите претпоставени. Има добиено бројни признанија за оваа иницијатива, што веќе ја следат и други волонтери.
ПОВРЗАНИ ВЕСТИ
Кавадарчанецот Борче Стаменов го донираше 1.000 компјутер, трошоци 0 денари
МИА/Фото: еМагазин/МИА