Аналитичарите од Секторот за борба со спортско насилство веќе два дена знаеја дека најмалку 100 хрватски хулигани на Динамо Загреб ќе пристигнат во Атина во договор со навивачите на Панатинаикос и за тоа писмено ги известиле сите надлежни служби на грчката полиција, но на крајот не успеаја да ја спречат трагедијата пред стадионот на АЕК, пишува грчкиот информативен портал „Њузит“, јави дописничката на МИА од Атина.
Дел од грчките медиуми, меѓу кои и„Њузит“, објавија два документа од Секторот за борба со спортско насилство, едниот со датум 6 август, а другиот ден подоцна.
Во првиот документ, пишува дека според Хрватската служба за разузнавање за натпреварот се очекува во Грција да отпатуваат околу 150 навивачи на Динамо Загреб, а според веродостоен извор на Секторот за борба со спортско насилство, „групата брои околу 100 лица и ќе биде сместена во различни Ербиенби апартмани во координација со навивачите на Панатинаикос, со кои се збратимени и имаат одлични односи и комуникација“.
Следниот ден, односно вчера во втор информативен билтен е наведено дека навивачите на АЕК организираат собир во 19 часот пред стадионот „под изговор дистрибуција на сезонски билети“.
Грчката полиција била информирана и од црногорските власти за, како што пишува во дописот од Подгорица до Атина, „потенцијално пристигнување на 100-200 ризични фанови, членови на организираната група на Динамо Загреб, Bad blue boys“.
Во дописот испратен вчера наутро, кој исто така го објавија грчките медиуми, црногорските власти не само што ги информираат грчките колеги за групата, туку и детално ги наведуваат возилата на Хрватите, односно марките и регистарските таблици на 22 хрватски автомобили.
ПОВРЗАНИ ВЕСТИ
(Видео) Хрватски фудбалски навивачи на Динамо во Атина убија 29-годишен навивач на АЕК
Сменети седуммина одговорни во грчката полиција
Во однос на преминувањето на грчката граница на навивачите на Динамо Загреб, нивното патување во Грција и нивното пристигнување на местото на инцидентите, нема да штедам зборови, недозволиво и неприфатливо е, бидејќи е под можностите и докажаните способности на грчката полиција, која иако брзо уапси 98 лица, потфрли во делот на превенција и спречување, рече министерот за заштита на граѓаните на Грција, надлежен за полицијата Јанис Иконому, јави дописничката на МИА од Атина.
Токму затоа, објасни Иконому, дал наредба до началникот на грчката полиција да бидат сменети одговорните на седум сектори во полицијата, односно надлежниот за справување со насилство во спортот и одговорните во шест сектори на сообраќајната полиција на потегот од градот Јанина до Коринт.
Навивачите на Динамо Загреб во Атина пристигнале по копнен пат, а во Грција влегле преку Албанија.
Од опозициските партии СИРИЗА и ПАСОК преку соопштенија реагираа за изјават и одлуката на Иконому и побараа да си поднесе оставка од позицијата министер за заштита на граѓаните.
Во синоќешните инциденти меѓу навивачите на АЕК и Динамо Загреб убиено беше едно лице, осум се повредени, а уапсени се 98 лица.
ПОВРЗАНИ ВЕСТИ
МИА