Од Министерството за финансии (МФ) информираат дека Комисијата за осигурување од автомобилска одговорност во МФ одлучила да се укине поскапувањето на цените на осигурувањето од задолжителна автомобилска одговорност и да се вратат старите.
Пред неколку дена осигурителните компании самоиницијативно ја поскапеа задолжителната осигурителна полиса за регистрација на возила за 15,4 отсто.
Комисијата предлага измени на тарифата за премии за осигурување со кои трошоците за вршење дејност на осигурителните компании се ограничуваат на 15 до 30 отсто од техничката премија, со што ќе се вратат старите цени.
„Предложените измени се насока на утврдување на опсег од 15 отсто до 30 проценти, во кој друштвата за осигурување можат да го определат делот на премијата за вршење дејност на осигурување од автомобилска одговорност, а за секој износ на овие трошоци над 30 отсто, да побараат претходна согласност од Агенцијата за супервизија на осигурување.
Ова значи враќање на цената на осигурувањето од автоодговорност на ниво од пред 25. април 2024 година“, велат од МФ.
Конечната одлука по предложените измени треба да ја донесе Владата.
Дополнително е утврдено Комисијата најдоцна до 30. септември секоја година до Владата да доставува предлог за минимална и максимална стапка на техничка премија за осигурување за следната година.
ПОВРЗАНИ ВЕСТИ