Во чест на Кочо Рацин, 13 планинари изодеа марш долг 170 километри и пристигнаа на врвот Стог, Лопушник во чија што близина се наоѓа гробот на Рацин.
„После изминати шест денови, 170 км, 12 -часовно секојдневно одење по пеколни температури и пороен дожд, ноќевања во манастири, планинарски домови и шатори, пристигнавме на посакуваната дестинација. Финален епилог: 13 планинари го изодеа цел марш од прв до последен ден, тројца се откажаа поради замор и работни обврски, а над 25 учествуваа во логистиката или некоја од етапите. Плускавци, еритеми, дехидрирања, замор, крлежи, грчеви, болки и отоци во колена беа составен дел од маршот“, вели Игор Смилев од „Грин Пауер“.
Тој им изрази благодарност за учество на планинарските клубови и друштва ЗПЗП Козјак 2013 од Куманово, Анапурна и Петрикор од Скопје, Волчко и Турни ме да Кинисам од Битола, Грин Пауер од Велес.
„Мотивот на маршот е да не го заборавиме најголемиот и најпреведуван македонски поет и еден од најсветлите ликови во нашата историја. Се уште живееме во реалноста за која пишуваше и живееше Рацин. Се потсмеваме на искрената љубов, и ги стигматиизираме сиромашните и социјално нееднаквите.
Неговите стихоови не потсетуваат на нашата несовршеност и се уште неоткриен и неискористен потенцијал за искрена и безусловна љубов. Рацин останува да биде совршен спој на минатото и иднината во чиј лик и зборови можеме долго да гледаме без да ја наведнеме главата. Фала и на Општина Велес за поддршката на овој марш и за развој на планинарењето“, додава Смилев.