Владата на една од последните седници донела заклучоци да им препорача на повеќе институции и на функционерите да забрзаат со спроведувањето на обврските кои произлегоа од Преспанскиот договор односно да го заменат името Македонија со Северна Македонија.
Меѓудругото, Владата им укажала на сите носители на јавни функции да ги изменат своите биографии со промена на името Република Македонија во Република Северна Македонија.
„Се задолжуваат, односно им се укажува на сите институции, а се препорачува на единиците на локалната самоуправа и Градот Скопје во рок од седум дена да ги ажурираат своите веб – страници со името Република Северна Македонија.
Се задолжуваат, односно им се укажува на сите институции, а се препорачува на единиците на локалната самоуправа да пристапат кон отстранување на симболот Сонце на Вергина од јавниот простор во рок од седум дена.
Се задолжува Археолошкиот музеј да го промени визуелниот изглед на фасадата на начин што наместо името Археолошки музеј на Македонија ќе стои Археолошки музеј на Северна Македонија.
Се задолжува Секторот за односи со јавност во Генералниот секретаријат на Владата на Република Северна Македонија да изработи визуелен приказ на плочите за одбележување на спомениците на видлив начин како и да одреди димензии на истите.
Се задолжува Службата за општи и заеднички работи на Владата на Република Северна Македонија во рок од 15 дена да изврши промена на фасадите на јавните институции и објекти со името Република Северна Македонија.
Се укажува на Агенцијата за млади и спорт да ги задолжи сите спортски федерации и здруженија во рок од 15 дена да направат промена на имињата, веб – страниците и дресовите на спортски здруженија, федерации и репрезентативни дресови со името Република Северна Македонија“, пишува во заклучоците на Владата.