Ми раскажуваше божиќната ѕвезда, дека најмногу го сака ова годишно време, кога се приближува денот на Христовото Раѓање.
Ѕвездата кажува:
Во целиот свет се слави. Градовите се украсени, накитени. Луѓето купуваат разни подароци. На радио, телевизија и во весниците, секој ден се најавуваат божиќни распродажби и големи попусти. Само што си помислив дека ќе се сетат на Бога, кога слушам, дека во некои западни земји повеќе и не зборуваат за Божиќ, туку само за дарување – ден за давање на подароци. Така тие го нарекуваат празникот на Рождеството Христово.
А тука кај вас, пазарите постанаа вистински мали дабови шуми. На сите страни бадникови гранчиња, па си помислив дека на некои им е поважен денот Бадник од самиот Божиќ. Но сепак, многу е убаво што луѓето барем еден ден во годината мислат на Бога.
Верував дека ќе купат бадникови гранчиња и подароци за да го прослават Божјиот Роденден со семејството, а тие мислат само на обичаите.
Изгледа дека светот заборавил зошто воопшто и се слави Божиќ. Го горат бадниковото гранче или го чуваат како украс, подготвуваат посна вечера, затоа што таков е обичајот (а тоа е всушност последниот ден од Божиќниот пост), ги помешале источните и западните обичаи, а во црква на богослужба само малкумина одат, ниту пак знаат дека бадниковото гранче е символ на Христовото Раѓање.
На Раѓањето на Богомладенецот малкумина помислуваат…
Гледав и некои од многубројните прослави. Ѕирнав низ прозорците од градинките, училиштата, претпријатијата, а таму – маси полни со секакви јадења, сѐ е убаво украсено. Многу подароци, божиќни пакетчиња, гласна музика, а ниту една единствена духовна песна. Возрасните и децата јадат и пијат, и всушност, за нив е тоа прославување на Божиќ. Но, за жал, сите тие заборавиле на Бога, дека всушност Го славиме Раѓањето на нашиот Господ Исус Христос.
Тоа е како, на пример, оној кој го прославува роденденот да го остават пред затворена врата. Замислете си, како вие би се чувствувале, да поканите гости за својот роденден, а гостите да ве исфрлат од домот, да ве остават надвор и на вас потполно да заборават?
За жал, секоја година е сѐ полошо. Луѓето мислат само на храната, подароците и на славењето, а на Бога малкумина се сеќаваат. Не е Божиќ заради бадниковите гранчиња, туку бадниковите гранчиња се заради Божиќ!
Точно на полноќ, сите наздравуваат, се прегрнуваат и целиваат, честитајќи си го едни на други празникот, а на Богомладенецот, заради чие Рождество се собрале, потполно заборавиле. Едните на други си подаруваат подароци, а за Богомладенецот Христос нема ништо. Ниту еден единствен, мал подарок.
Како би се чувствувале вие, кога на вашиот роденден, гостите меѓу себе би си подарувале подароци, а на вас не би ви подариле ништо?
А што, всушност, сака Господ да Му подарат луѓето за Неговиот роденден?
Сака да Го примат во своето срце. Да разберат дека Он заради нив дошол на овој свет и дека од голема љубов се жртвувал за спасение на сите. Затоа што Он луѓето неизмерно ги љуби и никогаш не ги остава.
Верата и љубовта кон Бога и ближните се најголемиот дар со кој можеме да Го даруваме Господа – Дарителот на сите добра.
ПОВРЗАНИ ВЕСТИ
Значењето на Бадник: Првите гласници на празникот се децата коледари, известувачи за Божиќ
Во пресрет на празниците: Поучен божиќен расказ за помош на сиромашните
Извор: Фејсбук/Манастир Св. Гаврил Лесновски/фото: МИА