„Бугарија не отстапува во однос на ставот за официјалниот јазик на С Македонија. Целосно ја почитуваме одлуката на Народното собрание, според која Бугарија не го признава овој јазик.
Во контекст на преостанатите 26 земји-членки, сепак, тие имаат свои позиции и ние никако не можеме да ги обврземе да го прифатат нашиот став.
Но, бугарската позиција е загарантирана во целата преговарачка рамка,“ изјави бугарската министерка за надворешни работи, Теодора Генчовска, одговарајќи на прашање дали Бугарија прави отстапки за јазикот со оглед дека целото законодавство на ЕУ ќе биде преведено на македонски јазик.
Важно е, додаде таа, дека ниту еден документ не може да се сфати како признавање на македонскиот јазик од страна на Бугарија, а тоа ќе биде јасно со едностраната декларација што ќе ја достави земјата до Брисел.
Одржувањето на состанокот на комисијата, според Генчовска, е важен момент од кои најважен резултат е Протоколот.
„Тој содржи исклучително амбициозни, краткорочни и долгорочни мерки чија цел е да решат многу од отворените прашања. Она што треба да се напомене е дека ова не е документ сам по себе, туку е составен дел од пакетот на т.н. француски предлог. Оттука натаму ќе продолжиме со работа на ниво на експерти со колегите од С Македонија“, рече Генчовска.
На прашање како Бугарија ќе гарантира дека С Македонија ќе го почитува протоколот, бугарската министерка посочи дека е важно што во него има конкретни рокови и што тој е поврзан со Преговарачката рамка.
На брифингот со медиумите, шефицата на бугарската дипломатија порача – дека отсега зависи само од С Македонија кога земјата ќе влезе во ЕУ и колку долго ќе се одолговлекува преговарачкиот процес.
ПОВРЗАНИ ВЕСТИ
(Видео) Потпишан протоколот меѓу Македонија и Бугарија
Османи не го објави Протокол кој денеска ќе го потпише, соопшти само детали
Фото: Влада