Организацијата „Една може“ ги повикува сите компании да донираат прехранбени, хигиенски, дезифициенски и разноврсни добра за самохраните мајки, повеќекратно дискриминирани жени и девојки и жртви на насилство.
Од таму велат дека прават заложби во насока на солидарност, емпатија, споделување, како што е и самиот слоган на иницијативата.
„Пандемијата влијае на сите сегменти на живеењето и мора да знаеме дека здравствената криза која ја предизвикува, истовремено се рефлектира и како економска и социјална криза и длабоко влијае врз животите токму на најмаргинализираните иднивидуи и заедници.
Овие активности се иницирани низ согледување на мноштвото дојави и барања за поддршка од страна на целната група. Помеѓу барањата за поддршка, најбројни беа оние на мајки со деца кои само од нив зависат, а биле дел од неформалниот пазар на труд и/или останале без вработување или извори на финансирање поради новонастанатата пандемична состојба предизвикана од Ковид-19, јавува работниот тим на „Една може“,“ вели Дороти Пачкова, родова експертка и предводничка на „Една може“.
Иницијативата „Заедно во се! – Солидарност, емпатија, споделување“ има свои хаштази на кои ќе ги обедини сите компании кои ќе донираат, ќе им издаде признаници за учество во благороднава мисија и прибраните донирани добра ќе ги насочи кон најранливите семејства, а сите активности може да се следат јавно на нивната ФБ страница: www.facebook.com/onecanednamozhe.
„Колку повеќе ќе соберат, толку повеќе трпези ќе наполнат и толку повеќе жени и деца ќе имаат пристап кон дезифициенси, хигиенски средства и ќе можат да се самозаштитат, а од “Една може“ донаторските пакети ќе им ги доставуваат до праговите на нивните домови.
Затоа, ова е повик кон сите, да донираат преку воспоставување на контакт: [email protected] или на мобилен во работно време: 071/936497, на двата ад хок пункта на “Една може“ – или во Карпош 1 или во Аеродром,“ велат од таму.