ЕВН и Министерството за образование и наука потпишаа меморандум за соработка за зголемување на вклученоста на приватниот сектор во промовирањето на средното стручно образование и во унапредување на квалитетот на учењето преку работа. Со ова ќе се создадат услови за одржливо вработување и самовработување на мажи и жени, кои ќе бидат конкурентни на пазарот на труд.
Целта на оваа соработка е да се зголемат знаењата и вештините кај младите преку унапредување на квалитетот на средното стручно образование и да се афирмираат придобивките од вклучување на приватниот сектор во образовниот процес. Со ова ќе се надмине јазот меѓу потребите на бизнис секторот и образовниот процес во земјава.
„Ова е плод на заедничката соработка меѓу ЕВН, владата и Министерството за образование“, посочи Штефан Петер претседател на управниот одбор на ЕВН. Тој упати апел до родителите да размислат за иднината на своите деца и да ги поддржат во одлуката да стекнат применливо образование за подобра иднина. „ Ако имаат афинитети и се дообразуваат ќе имаат можност да стигнат далеку, дури до високи раководни функции“, додаде Петер.
Министерот за образование и наука, Арбер Адеми изрази голема благодарност до ЕВН за подадената рака во спроведувањето на дуалното образование и поддршката на младите. Како следен конкретен проект на ЕВН што е дел од оваа соработка е отворањето на ЕВН паралелка во ОСТУ „ Гостивар“ во Гостивар, најави министерот Адеми.
Учениците ќе учат во насоките електричари и електромонтери за електроенергетски мрежи, ќе посетуваат практикантска работа и по завршувањето на средното стручно образование во зависност од успехот ќе добија и понуди за работа во ЕВН. Ова е втора паралелка на ЕВН од ваков тип. Третата генерација електричари и електромонтери од СЕТУ „ Михајло Пупи“ од Скопје веднаш по завршувањето на образованието во 2020 година ќе имаат можност стекнатите знаења и вештини да ги применат на работните места во ЕВН.