Лидерот на ВМРО-ДПМНЕ, Христијан Мицкоски и потпретседателот на партијата Александар Николоски денеска во Будимпешта имаа средба со премиерот на Унгарија и претседател на партијата Фидес, Виктор Орбан, како и работен појадок со унгарскиот министер за надворешни работи, Петер Сијарто.
На средбата Мицкоски зборувал за блокираните европски интеграции и побарал помош од Унгарија и севкупна поддршка за земјава, информираат од партијата.
ПОВРЗАНИ ВЕСТИ
Мицкоски на средби со Орбан и Јанша ќе бара одблокирање на евроинтеграциите
Како што информираат од партијата, на средбата со Орбан биле констатирани одличните и пријателски односи кои што постојат помеѓу сестринските партии ВМРО-ДПМНЕ и унгарската Фидес.
Мицкоски, како што се наведува, се осврнал и на блокираните европски интеграции кои се последица на последното вето на источниот сосед, кое што Македонија ја одалечува од стратешката цел членство во ЕУ.
Претседателот на ВМРО-ДПМНЕ побарал поддршка од Унгарија за одблокирање на патот кон ЕУ и воедно севкупна поддршка за земјава на патот кон европските интеграции.
„Премногу долго државата е заробена во недостаток на реформи, калкулирања и тапкање во место што резултира со оправдана нервоза, но и своевидна фрустрација во исполнувањето на стратешката агенда.
Точно е дека македонската влада има огромен застој во исполнувањето на реформите, неисполнети ветувања, и не до крај посветен пристап кон интеграциите, исто како што е точно дека државата и сите нејзини граѓани не смеат да бидат заглавени поради таквата неспособност на домашната влада, но и недоволната спремност на сите земји членки на Унијата да подадат искрено рака на земјите апсиранти кон ЕУ„, рекол Мицкоски на средбата.
Соговорниците, како што се наведува во соопштението, размениле мислења и за економската и здравствената состојба, како и предизвиците кои произлегуваат од Ковид-19 пандемијата.
„Македонската економија е во рецесија и над 50 илјади наши сограѓани ги загубија своите работни места. На граѓаните им недостасува конкретен план како да се излезе од кризата, но и сигурност и перспектива.
Најголемиот дел од граѓаните очекуваат од владата стратегија и план како тие ја проектираат иднината за одреден период од сега. За огромна жал Македонија е меѓу земјите со најголем број на починати споредено со бројот на жители поради Ковид-19 пандемијата.
И тоа е доказ за неспособното и не до крај доволно посветеното работење на властите во надминувањето на предизвиците. На тој план клучна е размената на знаења и искуства со понапредните држави, како што е Унгарија и би бил багодарен доколку Унгарија помогне на тој план со било кој свој расположлив потенцијал“, истакнал Мицкоски на средбата со Орбан.
На работниот појадок со министерот Сијарто, станало збор за стратешките приорити врзани со членството на државата во Европската Унија.
Како што се посочува во соопштението од ВМРО-ДПМНЕ, Мицкоски побарал од Сијарто поддршка и вклучување во одблокирање на пристапиот процес.
Мицкоски посочил дека државата не смее да преговара за своите идентитетски обележја и тоа не смее да биде цената за напредок на земјава кон патот на Европската Унија.
Фото: ВМРО-ДПМНЕ