Неодамна официјално беше отворен реконструираниот стакленик од Ботаничката градина во Скопје која се наоѓа во состав на Ботаничкиот завод на Институтот за биологија при Природно – математичкиот факултет.
Иницијативните активности поврзани со ботаничката градина датираат од 1948 година, кога по барање на Катедрата по биологија Управата на градскиот парк во Скопје отстапила простор за нејзино формирање. Подоцна во 1951 година, со оградувањето на околу 14 ха земјиште се зацртуваат границите на просторот наменет за ботаничката градина.
Ботаничката градина претставува единствен објект од ваков вид во градот Скопје и пошироко во Република Македонија. Со својата дејност и местоположба таа прераснува во значајна институција од наставно – научен, едукативен, културен и рекреативен карактер.
Во ботаничката градина можат да се сретнат многу растителни видови, пред се од дендрофлората, која е застапена со околу 200 видови со различно географско потекло, а не е мал бројот и на автохтоните и алохтоните тревести видови, организирани во посебни систематски полиња.
Фото: Фејсбук/Ботаничка градина