АД „Пошта на Северна Македонија“ – Скопје издаде поштенска марка со погрешна карта на Хрватска.
На марката е картата на „Голема Хрватска“, која ги опфаќа и териториите на денешна Босна и Херцеговина и дел од Србија и Црна Гора.
Од Пошта се извинија преку соопштение за ненамерната грешка и техничките пропусти, како што велат, “при објавување на пригодната поштенската марка од серијата „Северна Македонија во ЕУ“, чија цел е одбележување на претседавањето на Република Хрватска со ЕУ„.
“На поштенската марка претставена е погрешна карта на Република Хрватска и другите земји од регионот и поради тоа марката веднаш се повлекува од употреба што подразбира поништување на целокупно издадениот тираж од 6.000 примероци.
АД „Пошта на Северна Македонија“ – Скопје изразува жалење за ненамерната грешка, особено што, издавањето на серијата поштенски марки „Северна Македонија во ЕУ“ се поклопува со 9 Мај, Денот на Европа.
Наша цел беше со оваа поштенска марка да изразиме благодарност до Хрватското претседателсво со ЕУ за помошта и поддршката која Република Хрватска и ја дава на нашата држава“, велат од Пошта.
Од таму информираат и дека по повод ненамерната техничка грешка се состанал Управниот одбор на Друштвото со цел преземање мерки во рамки на своите надлежности, а во согласност со Правилникот за издавање и продажба на поштенски марки и вредносници.
„На итно одржаната седница на ден 09 мај 2020 година, Управниот одбор на Друштвото донесе одлука за повлекување од употреба на поштенската марка на тема „Северна Македонија во ЕУ“, мотив „ Хрватска (Загреб)“ со тираж од 6.000 примероци и номинална вредност од 72 денари со ден на пуштање во употреба на ден 08.05.2020 година.
Со предметната одлука се утврдува и поништување на целокупниот тираж“, велат таму и информираат дека е донесена и одлука за разрешување на раководителот на Бирото за филателија и
одлука за разрешување на Советот за поштенски марки.
ПОВРЗАНИ ВЕСТИ
Протестна нота од Србија за поштенската марка со картата на „Голема Хрватска„