Гласањето на предвремените парламентарни избори во првиот час и половина минува непречено, а одзивот на гласачите според податоците до 9:00 часот од 2.326 избирачки места, каде гласале 94.167 гласачи е 5,19 отсто, информираше портпаролот на Државната изборна комисија (ДИК), Адмир Шабани на прес-конференција.
Навреме се отворени сите гласачки места во 7:00 часот, а гласањето ќе заврши во 21:00 часот.
Се гласа на 3.480 избирачки места, а на 90 има помалку од десет гласачи така што тие се изјаснуваат во најблиското гласачко место.
Во ИЕ 1 одзивот на гласачите е 6,58 отсто. Најмногу гласачи до 9:00 имало во општина Аеродром каде одзивот е 10,13 отсто, додека најмал е одзивот во Студеничани – 1,81 отсто.
Во ИЕ 2 одзивот е 4,58 отсто. Највисок е во Ѓорче Петров – 8,05 отсто, а најмал во општина Липково – 0, 93 отсто.
Шабани не ги соопшти податоците од изборната единица 4.
Во ИЕ 3 одзивот до 9:00 часот е 6,1 отсто. Во оваа изборна единица најмногу гласачи до 9:00 часот излегле во Крива Паланка – 8,31 отсто и Пробиштип со 10,25.
Во ИЕ – 5 одзивот е 5,22. Највисок е одзивот во Кривогаштани 13,1, додека во Центар Жупа е најмал – 1,01 отсто.
Во ИЕ – 6 одзивот на гласачите е 2,59. Во Јегуновце бил највисок 4,17 додека најмал во Врапиште 1,39 отсто.
Право на глас на овие избори имаат еден милион 814 илјади и 613 гласачи.
Шабани информираше дека во понеделникот правото на глас го искористиле вкупно 723 граѓани позитивни на Ковид -19 и во самоизолација.
Од вкупно 8.852 болни, немоќни и хронично болни чии пријави беа прифатени гласале 8.325 односно 94,04 отсто.
Во 13 Казнено-поправни домови од 1.657 запишани во избирачкиот список гласале 1.272 односно 76,76 отсто. Во 17-те старски домови од 357, гласале 234 избирачи односно 80,62 отсто.
Шесте внатрешно-раселени лица не гласале.
До одржувањето на прес-конференцијата, официјало не пристигнал ниту еден приговор за гласањето до ДИК.
МИА/Фото: МИА
ПОВРЗАНИ ВЕСТИ
Предвремени парламентарни избори: Македонија гласа со маски