Несекојдневна полемика имаше денеска на Фејсбук-профилот на премиерот Зоран Заев, кој со пост го одбележа денот на раѓањето на македонскиот револуционер Гоце Делчев.
„Денеска 4 февруари, денот на раѓањето на великанот и инспираторот на македонското национално револуционерно дело – Гоце Делчев, се сеќаваме и оддаваме почит на неговиот историски придонес во создавањето на македонската државност.
Како инспиратор и двигател на македонската револуционерна организација, Гоце Делчев секогаш повикуваше на единство и сплотеност во политичките предизвици пред кои е исправена земјата од сите општествени чинители и граѓани, без разлика на нивната верска, етничка или политичка припадност.
Идеалите и заложбите на овој великан се наша заедничка обврска да продолжиме да ја градиме државата како демократска и економски напредна земја, која денеска е дел од најмоќниот воено-безбедносен сојуз НАТО и земја која чекори кон членство во ЕУ“, напиша Заев.
На неговиот пост коментираше бугарскиот политичар Ангел Џамбаски со познатите ставови дека Гоце Делчев бил Бугарин, а ВМРО била бугарска организација.
На тоа не остана должен лидерот на ВМРО-ДПМНЕ, Христијан Мицкоски којшто искоментира дека со оглед на тоа што премиерот Заев решил да не ги брани македонските интереси тој ќе одговори дека ВМРО е Македонија, а Гоце Делчев Македонец.
Овој чин поттикна лавина коментари и „расправа“ околу тоа чии се ликот и делото на македонскиот револуционер Гоце Делчeв.
Фото: Влада