Деновиве граѓанската иницијатива „Шанса за Центар“ објави податок дека над 100 објекти, меѓу кои и големи јавни претпријатија и установи во Скопје користат мазут или нафта како енергенс за загревање.
ПОВРЗАНИ ВЕСТИ
Според нивната евиденција, мазут користи ЈСП во своите автобази, како и Железници-транспорт и Клиниката за физикална медицина и рехабилитација.
На нафта пак се греат огромен број училишта, градинки и болници во целиот град. Дури и Институтот за белодробни заболувања кај децата во Козле користи ваков енергенс.
Постојат и установи, како што е затворот „Идризово“, кои како енергенс за загревање користат дури и јаглен.
Според евиденцијата на договорите за јавни набавки што ја направила „Шанса за Центар“, за време на оваа грејна сезона јавните установи и претпријатија што работат во Скопје ќе потрошат над 2,7 милиони литри нафта за загревање на нивните работни простории, а со количината мазут што ќе се употреби за оваа намена може да се наполни еден олимписки базен.
Според екологистите, мазутот и нафтата за греење се исклучително „валкани“ енергенси, бидејќи содржат многу повеќе сулфур и азотни оксиди, во споредба со природниот гас.
Според студијата на Финскиот метеоролошки институт, изработена во 2016 година за потребите на Министерството за животна средина и просторно планирање, греењето со мазут е еден од главните фактори кои придонесува за загадувањето на амбиенталниот воздух во скопската котлина.
Оттука, се поставува дилемата – кога надлежните инспектори за животна средина ќе спроведат контрола на јавните установи и претпријатија во Скопје за да утврдат дали го загадуваат воздухот горејќи мазут, нафта и јаглен и кога јавно ќе ги објават резултатите од тие контроли.
Исто така, останува нејасно зошто како една од клучните мерки за намалување на загадувањето во Скопје, Градот Скопје и надлежното министерство не ги задолжат јавните установи и претпријатија во Скопје да го заменат мазутот, нафтата и јагленот со природен гас, како еколошки поприфатлив енергенс?