Заклучно со јуни, годинава 171,3 милијарди денари или околу 2,7 милијарди евра изнесува сумата на кредити што банките и штедилниците им ги дале на граѓаните. И покрај кризата што ја предизвика кризата од корона вирусот граѓаните продолжија да се задолжуваат.
Според податоците на Народната банка, во јуни, вкупните кредити на домаќинствата забележаа месечен раст од 1,3%, којшто во најголем дел произлегува од денарските кредити.
Годишниот раст изнесува 8,8% и се должи на зголемените кредити во денари и странска валута, при поголем придонес на кредитите во денари. Со исклучување на ефектот од преносот на сомнителните и спорните побарувања од билансна во вонбилансна евиденција, согласно со одлуката на Народната банка, годишниот кредитен раст кај домаќинствата во јуни изнесува 9,6%.
Податоците покажуваат пораст кај станбените и потрошувачките кредити, а пад кај автомобилските кредити и картичките.
„Во јуни, гледано според намената на кредитите одобрени на физичките лица, потрошувачките кредити и станбените кредити, како најзастапени категории, забележаа раст од 1,1% и 1,4%, на месечно ниво, и 10,0% и 13,8%, на годишно ниво, соодветно. Автомобилските кредити и натаму бележат месечен и годишен пад од 1,3% и 8,6%, соодветно.
Кредитите одобрени на кредитни картички и негативните салда на тековните сметки на месечно ниво се зголемени за 0,2% и 1,3%, соодветно, додека на годишна основа остварија пад од 4,2% и 9,4%, соодветно. Кредитите одобрени врз други основи, овој месец, бележат месечен и годишен пад од 0,2% и 6,4%, соодветно“, соопшти Народната банка.
Сепак, и покрај континуираното задолжување забележително дека дел од граѓаните продолжија да штедат.
Вкупните депозити на домаќинствата, во јуни, се зголемија за 0,8% на месечно ниво, главно како резултат на растот на депозитните пари, како и на краткорочните и долгорочните депозити во странска валута, при пад на долгорочните и краткорочните депозити во денари.
Анализирано на годишно ниво, депозитите на домаќинствата се зголемени за 8,7%, пред сè поради повисоките депозитни пари, како и краткорочните депозити во странска валута.