Уставниот суд денеска го отфрли барањето на пратеникот на ВМРО-ДПМНЕ, Антонио Милошоски, за заштита на слободи и права, во врска со обвинението против него во случајот „Моќник“.
“Имено, во конкретниот случај подносителот истакнува барање за заштита на слободи и права, a како акти со кои му биле повредени слободите и правата приложи обвинителен акт и решение со кое обвинителниот акт бил одобрен во целост, меѓутоа Уставниот суд оцени дека обвинителниот акт не претставува поединечен акт со кој се одлучува за поединечни слободи и права за граѓаните, односно за ограничување или одземање на одредени слободи и права гарантирани со Уставот, туку станува збор за поднесок, односно едностран процесуален акт, кој е основа за водење на кривична постапка.
Имајќи го предвид погоре изнесеното и според означената одредба од членот 51 од Деловникот, Судот одлучува за заштита на слободи и права повредени со конечен или правосилен поединечен акт, како и имајќи ја предвид одредбата од членот 52 од Деловникот, според кој во барањето од членот 51, потребно е да се наведат причините поради кои се бара заштита, актите или дејствата со кои тие се повредени, фактите и доказите на кои се заснова барањето, како и други податоци потребни за одлучувањето на Уставниот суд, а во конкретниот случај обвинителниот акт што со овој предмет не е случај.
Судот утврди дека не се исполнети процесните претпоставки од наведените одредби од Деловникот на Уставниот суд, за мериторно постапување и одлучување по барањето за заштита на слободите и правата“, велат од Уставен суд.
Во случајот „Моќник“, кој го отвори поранешното Специјално јавно обвинителство, Милошоски е третоосомничен и се товари за делата измама и за злоупотреба на службената положба и овластувања.
Основниот кривичен суд во Скопје во октомври 2020 година го прифати обвинението на Основното јавно обвинителство Скопје, а покрај него меѓу обвинетите е и неговиот татко Милош Милошоски, поранешниот претседател на Комисијата за лустрација, Томе Аџиев и дел од членовите на Комисијата.
Фото: Милошоски/Фејсбук