Бимилк, водечката компанија за млеко и млечни производи која посветено работи на промовирање на здравјето на децата, по повод Светскиот ден на млекото заедно со ЈОУДГ „Мајски цвет” Битола ја создадоа детската креативна патека до Битолското детско игралиште, лоцирано во Градскиот парк во Битола, кое е исто така инвестиција на оваа компанија од минатата година, информираат од таму.
Оваа иницијатива има за цел да обезбеди уникатно и извонредно искуство за децата, а истовремено поддржувајќи благородна цел.
Светскиот ден на млекото, глобално се слави на 1-ви јуни, со цел да се препознаваат хранливите придобивки и важноста на млекото во животот на децата. Служи како потсетник за улогата што млекото ја игра во промовирањето на нивниот раст, сила и севкупното здравје.
На овој значаен ден, го славиме и патрониот празник на градинката „Мајски цвет”. Бимилк, за овој проект соработуваше со градинката „Мајски цвет”, за да создаде детска креативна патека што ќе ја плени имагинацијата на младите умови.
Детската креативната патека, нуди единствено искуство дизајнирано да ги вклучи сетилата на децата и да ја поттикне нивната љубопитност. Додека се движат низ патеката, децата ќе наидат на низа интерактивни елементи кои ќе ги охрабрат да истражуваат, учат и да ги развиваат своите когнитивни способности.
„Исполнета сум со огромна радост што сум сведок на откривањето на оваа детска креативна патека во детскиот парк, иницијатива што гордо ја поддржуваме од неговото создавање а воедно е продолжение на она што го започнавме уште минатата година во септември, создавањето на едно заедничко фамилијарно место за сите нас, Битолското детско игралиште кое секојдневно ги поттикнува насмевките на голем број дечиња“, изјави Полексена Јанкуловска, регионален маркетинг менаџер на Бимилк.
„Светскиот ден на млекото не само што ја означува важноста на млекото како здрав извор на исхрана, туку го истакнува и големото влијание што тоа го има врз растот и развојот на нашите деца. Тоа е ден за препознавање на чудата што ги создава млекото, негувајќи ги младите умови и тела со неговите десет витални витамини колку што содржи ова наше млеко“, дополни Јанкуловска.
Децата од градинката својата креативност ја изразија и преку правење предмети од амбалажи од производите на Бимилк.
„Голема благодарност до сите родители за прекрасните и креативни изработки направени со амбалажа од производите на Битолската млекара. Навистина се изненадивме од вашата креативност и од можноста да се направат толку оригинални и различни рачни изработки.
Особено сакам да им се заблагодарам и на вработените на Детската градинка Мајски цвет за нивната посветеност и несебично вложување во секојдневната работа со нашите најмили, како и на целиот тим во позадина кој обезбедува најдобри услови за нивно згрижување.
Сѐ за децата, децата се нашето најголемо богатство, нашата иднина! Ние секојдневно се стремиме да бидеме градинка во која децата доаѓаат задоволни и заминуваат збогатени со нови доживувања, искуства и знаења”, истакна Кристина Лајмановска, директор во ЈОУДГ „Мајски Цвет“ Битола.
Оваа детска креативна патека, ќе служи како порта за имагинација и откривање. Овде тие не само што ќе ја искусат убавината на природата туку и ќе ги развијат своите когнитивни и сензорни способности, негувајќи го нивниот раст во средина која поттикнува учење преку игра.
Бимилк продолжува да биде компанија, длабоко посветена на промовирање на здравјето и благосостојбата на децата и ги охрабрува сите да се приклучат на одбележувањето Светскиот ден на млекото. Заедно, да создадеме магични моменти, да ги поддржиме оние на кои им е потребна и да инспирираме посветла иднина за нашите млади, порачуваат од таму.
