Одложувањето на почетокот на учебната година за еден месец има медицинска оправданост и е поради епидемиолошката состојба како прва причина, а втората е легислативата, односно неможноста да се носат закони или измени до формирање ново Собрание и Влада, рече премиерот Оливер Спасовски одговарајќи на новинарски прашања, на денешната прес-конференција.
Тој истакна дека периодот од еден месец, до 1 октомври, треба да биде посветен само на избирање модел кој, како што рече, „ќе биде нужно зло во една ваква состојба“ и дека заедно треба многу повеќе да се посветат на вистински реформи на образовниот процес кои ќе дадат поголем квалитет.
На денешната прес-конгференција посветена на преодната Влада, Спасовски оцени дека таа добро се справила со деветмесечните предизвици и го отворила патот на оваа Влада за продолжување со изборите.
Спасовски најави и четврт сет на економски мерки, во рамките на кој, невработените лица и самохраните родители ќе добијат домашни платежни картички.
Во однос на Министерството за внатрешни работи, рече дека во овој изминат деветмесечен период таму се случувале многу чудни работи и многу преместувања и деградации, кои не требало да се случат, ако сакаме да имаме полиција како што сите посакуваме.
„Од моментот кога Парламентот ќе ја изгласа владата ќе седнам и ќе видам што е направено во овој изминат период од скоро девет месеци и секако дека, како што водев дијалог и претходно, ќе седнам да раговарам и со вработените и со синдикатите. Врвниот приоритет е дека мора да изградиме професионална полиција, која ќе служи на државата и граѓаните,“ изјави Спасовски.
ПОВРЗАНИ ВЕСТИ
Учебната година ќе почне на 1 октомври
МИА/Фото: Влада