Србија вовeдува нови, поостри мерки во борбата против корона вирусот. Од вечерва на полноќ сѐ ќе биде затворено, освен продавниците за храна, аптеките и бензинските пумпи, мерка што важеше изминатиот викенд.
Тоа го изјави премиерката на Србија, Ана Брнабиќ, која додаде дека ова мерка ќе важи најмалку до понеделник, како и дека засега нема да се воведува полициски час.
„Апелирам на максимална дисциплина, на разбирање за состојбата во која се наоѓа здравствениот сектор и работниците, да се обидеме да им помогнеме и да ги заштитиме, ако веќе некои немаат доволно разбирање за себе иза своите семејства“, изјави Брнабиќ, додавајќи дека до понеделник ќе работат само прехранбените продавници, аптеките и бензинските пумпи, она што е неопходно за колку-толку нормален живот.
Државните институции продолжуваат со работа, како и градинките, банките и поштите.
„Мерките се остри, но ќе траат само пет дена, иако кризниот штаб побара да траат две недели. Дали тие ќе бидат продолжени и после следниов понеделник, зависи од сите нас“, рече Брнабиќ.
Таа изјави дека очекува вакцинацијата против Ковид-19 наскоро да ги покаже резултатите, иако нема да може да се прогласи и победа и апелира граѓаните да се вакцинираат.
„Секојдневно за вакцинација се пријавуваат меѓу 10.000 и 12.000 лица, но имаме и пунктови на кои имунизацијата се спроведува без закажувања“, изјави Брнабиќ.
Таа додаде дека вчера во Србија пристигнале 16.380 вакцини на Фајзер, што не е доволно ни за еден ден. Во понеделник ќе пристигне нов контигент од 60.000 од овие вакцини како и нови „Спутник V“ вакцини.
ПОВРЗАНИ ВЕСТИ
Во Србија со две дози вакцинирани 791.000 граѓани