Иако датумот за парламентарните избори во Бугарија се уште не е познат, а официјално не е започната ниту предизборната кампања, анонимни лица веќе потрошиле десетина илјади евра за да го воспеваат бугарскиот премиер Бојко Борисов на Фејсбук, пишува истражувачкиот портал Офњуз (OFFNews), пренесува Дојче веле.
Две Фејсбук страници за помалку од три месеци платиле точно 9.839 евра за реклама во полза на премиерот Бојко Борисов.
Се работи за страниците „Vozhda” и „Zeitgeist България”.
Она што според бугарскиот портал е особено интересно во случајот е фактот што меѓу модераторите на овие страници се појавуваат и лица од Северна Македонија.
„Интересното е што меѓу модераторите на страниците има и Македонци. Изгледа дека зад двете страници стојат истите луѓе, а уште поверојатно е дека се работи за Пи-Ар агенција“, пишува Офњуз.
Страницата „Vozhda“ е создадена на 29 октомври минатата година, во Бугарија, но двајца од шестмината администратори се од Северна Македонија. Нивните имиња се непознати, а од страницата не одговориле на прашањата на Офњуз.
Страницата „Бермудски триаголник“, финансирана од вториот споменат рекламер „Zeitgeist България” исто така била активна во последните три месеци, а во неа, еден од четворицата модератори е од Северна Македонија.
Од владејачката ГЕРБ на премиерот Борисов за Офњуз изјавиле дека немаат ништо заедничко со двете Фејсбук страници и дека не плаќаат реклами на Фејсбук.
ПОВРЗАНИ ВЕСТИ
Фото: Фејсбук/Борисов