Комисијата за односи со верските заедници информира дека Црквите, верските заедници и религиозните групи споменати во Уставот апелираат до граѓаните да бидат крајно одговорни и да ги почитуваат мерките за заштита од Ковид-19.
„Ние ‒ Црквите и верските заедници испраќаме едногласен АПЕЛ до сите наши верници и до сите граѓани на нашата држава, на актуелната состојба со корона- вирусот Ковид 19 да гледаат со највисок степен на сериозност и со целосно и доследно почитување на сите пропишани мерки да го заштитат сопственото, здравјето на блиските, на здравствените работници и со тоа на севкупното општество.
Доследното почитување на мерките не треба да се толкува како имање слаба вера, туку како имање љубов и грижа за другите.
Сега е време кога секој човек мора да покаже грижа и да даде личен прилог во справувањето со настанатата состојба. Мерките треба да ги почитуваме постојано, во внатрешен и надворешен простор, на работните места, во верските храмови, во домовите и на јавните површини.
Во овие времиња да бидеме силни и свесни дека искушенијата доаѓаат поради лично преиспитување и зацврстување во верата,“ се вели во соопштението.
Апелот доаѓа од Архиепископот Охридски и Македонски г.г. Стефан, в.д. Реисул Улема на Исламската верска заедница х. хфз. Шаќир еф. Фетаху, Бискупот Скопски и епарх струмичко-скопски монсињор Киро Стојанов, претседателот на Еврејска верска заедница Романо Николиќ и Супериндендентот на Евангелско- методистичка црква Марјан Димов.