Подобрена е ситуацијата со пожарот во северниот дел на грчкиот остров Евија, меѓутоа огнената стихија сè уште не е ставена под контрола, а дел од жителите ноќта ја поминаа во ферибот, јави дописничката на МИА од Атина.
ПОВРЗАНИ ВЕСТИ
(ВИДЕО) Шокантни снимки од пожарите во Грција
Во текот на ноќта пожарникарите и локалното население во повеќе села на островот водеа битка за да се спасат домовите и да се спречи дополнително ширење на пожарот и да се ограничат жариштата што се на повеќе различни локации.
Жителите на селото Пефки, но и на околните села, ноќта ја поминаа на плажата и во фериботот во кој беа пренесени евакуираните, меѓу кои и стари лица и лица со здравствени проблеми.
Северниот дел на Евија гори веќе седми ден, а според противпожарната служба на Грција, интервенираат 620 пожарникари со 35 пешадиски тима и 131 возило, меѓу кои и противпожарните сили од Украина, Романија и Србија.
Од воздух, подготвени за интервенција се пет хеликоптери и пет авиони меѓу кои и авионот Бериев-200 .
Освен на Евија, во Грција активни се пожарите и во северниот дел на областа Атика, поширокиот регион на Атина и во областите Илија, Месинија и Лаконија на Пелопонез.
ПОВРЗАНИ ВЕСТИ
(Вознемирувачко видео) Горат предградија на Атина: Илјадници жители ги напуштија домовите
За справување со пожарите во Грција помош испратија над 20 земји: Кипар, Франција, Хрватска, Шведска, Романија, Шпанија, Чешка, Германија, Полска, Словачка, Австрија, Украина, Израел, Швајцарија, Египет, Велика Британија, Кувајт, Катар, Молдавија, Обединетите Арапски Емирати, Србија.
МИА/Фото/видео: OPEN/newsittv