Виртуелниот паметен споменик на Григор Прличев во Охрид со кој можеше да се комуницира и кој беше промовиран во средата е вандализиран. Непознати сторители се обиделе да му го извадат главниот компјутер, а пресечени биле и жиците за довод на струја.
„Вечерва на 11-ти август, после нецели 48 часа од промоцијата, паметниот споменик на виртуелниот Прличев, кој години го работев со мојот тим и поддршка на Општина Охрид беше вандализиран и онеспособен од функција.
Непознати лица го пресекле доводот до електрична енергија, го отстраниле македонското знаме и ги искорнале написите. Се обиделе да ги отворат и металните врати за да стигнат до главниот компјутер, но поради цврстиот материјал и безбедносните брави успеале само искривувања да нанесат на истите.
Случајот беше веднаш пријавен во МВР Охрид, при што екипа направи увид и ќе ја проследи постапката до Јавното Обвинителство.
Споменикот е времено надвор од функција, но активно работиме заедно со Општина Охрид на негово рестартирање, како и со безбедносните служби за негова заштита од социопатите со кои за жал нашите деца го делат плоштадот“, напиша авторот на споменикот, проф. д-р Анис Сефиданис на Фејсбук.
Фото: Општина Охрид/видео: Фејсбук/Сефиданис